Verkefni umhverfisráðuneytis

Umhverfisráðuneytið var stofnað árið 1990. Með stofnun þess voru stjórnvöldum sköpuð skilyrði til að móta og framfylgja heildstæðri stefnu í umhverfismálum. Markmiðið með ráðuneyti fyrir umhverfismál er að styrkja almenna umhverfisvernd, efla samvinnu ráðuneyta og stofnana er vinna að þessum málaflokki og stuðla að virkri þátttöku Íslendinga í alþjóðlegu samstarfi á sviði umhverfismála.

Umhverfisráðuneytið starfar samkvæmt  forsetaúrskurði um skiptingu stjórnmálaefna milli ráðuneyta. Ráðuneytið fer með mál er varða náttúruvernd, skógrækt og landgræðslu, vatnsvernd, mengunarvarnir, loftslagsvernd, stefnumörkun um sjálfbæra þróun, veður og náttúruvá, erfðabreyttar lífverur, veiðistjórnun, dýravernd og alþjóðaverslun með villt dýr og plöntur.

Sömuleiðis fer ráðuneytið með söfnun og skráningu upplýsinga um náttúru landsins, umhverfisrannsóknir og umhverfisvöktun, söfnun upplýsinga um málefni norðurslóða, landmælingar og grunnkortagerð og  upplýsingarétt um umhverfismál.

Þá fer ráðuneytið með málefni er varða efni og efnavörur, hollustuhætti og heilbrigðiseftirlit, skipulagsmál, mannvirki, mat á umhverfisáhrifum áætlana og framkvæmda og framkvæmd alþjóðasamninga um umhverfismál.