Vernd villtra spendýra og fugla tekin til skoðunar
-
RefurRefurinn er eina landspendýrið sem var á Íslandi við landnám. Myndin er tekin af vísindavef Háskóla Íslands.
Svandís Svavarsdóttir umhverfisráðherra hefur skipað nefnd til að skoða lagalega stöðu villtra spendýra og fugla á Íslandi og leggja fram tillögur um úrbætur á lögum um vernd, friðun og veiðar á villtum fuglum og villtum spendýrum. Að mati umhverfisráðherra þarf að endurskoða löggjöfina í ljósi breyttra aðstæðna frá því að lögin tóku gildi árið 1994. Á þeim tíma hefur Ísland staðfest ýmsa alþjóðlega samninga sem lúta að verndun dýra og búsvæða þeirra og kalla sumir þessir samningar á breytingar á íslenskri löggjöf. Auk þess þykir nauðsynlegt að endurskoða lögin vegna tilskipana Evrópusambandsins sem kalla á breytingar í íslensku lagaumhverfi, til að mynda NATURA 2000 og fuglatilskipun EES.
Markmið laga um vernd, friðun og veiðar á villtum fuglum og villtum spendýrum er að tryggja viðgang og náttúrulega fjölbreytni villtra dýrastofna, skipulag á veiðum og nýtingu dýra, svo og skipulag á aðgerðum til að koma í veg fyrir tjón sem villt dýr kunna að valda.
Eftirtaldir skipa nefndina:
- Menja von Schmalensee, formaður, skipaður án tilnefningar.
- Páll Hersteinsson, skipaður án tilnefningar.
- Hólmfríður Arnardóttir, án tilnefningar.
- Kristinn Haukur Skarphéðinsson, fulltrúi Náttúrufræðistofnunar Íslands.
- Hildur Vésteinsdóttir, fulltrúi Umhverfisstofnunar.
- Sigmar B. Hauksson, fulltrúi Skotvís.
- Tómas Grétar Gunnarsson, fulltrúi frjálsra félagasamtaka á sviði náttúruverndar.
- Auður Lilja Arnþórsdóttir, fulltrúi Dýralæknafélag Íslands.
Lög um vernd, friðun og veiðar á villtum fuglum og villtum spendýrum.