Fundað vegna olíuslyss í Bláfjöllum
Nýlegt olíuslys á vatnsverndarsvæði í Bláfjöllum var efni fundar sem haldinn var í umhverfis- og auðlindaráðuneytinu í dag. Um var að ræða upplýsingafund þar sem farið var yfir hvernig bregðast skuli við slysinu og hvaða lærdóm draga megi af því.
Á fundinum voru auk fulltrúa ráðuneytisins fulltrúar frá Umhverfisstofnun, Orkuveitu Reykjavíkur, Vatnsveitu Hafnarfjarðar, Samtökum sveitarfélaga á höfuðborgarsvæðinu, Heilbrigðiseftirliti Reykjavíkur og Heilbrigðiseftirliti Hafnarfjarðar- og Kópavogssvæðis.
Fundurinn var í alla staði gagnlegur og höfðu fundarmenn tækifæri til að koma á framfæri ólíkum sjónarmiðum varðandi umgengni, reglur á vatnsverndarsvæðinu og framtíðarsýn. Þá viðruðu menn ólíkar skoðanir á því hvernig bregðast megi við í því skyni að koma í veg fyrir að atburður sem þessi endurtaki sig.
Í framhaldi fundarins mun umhverfis- og auðlindaráðuneytið í samvinnu við Umhverfisstofnun fara yfir þær ábendingar sem fram komu á fundinum og meta hvort ástæða sé til að bregðast sérstaklega við, m.a. með tilliti til laga og reglna, verkferla og forvarna.