Fréttasafn

15.4.2013

Friðlýsing Teigarhorns undirrituð

  • Frá undirritun friðlýsingar Teigarhorns.
    Frá undirritun friðlýsingar Teigarhorns.
    F.v. Kristín Linda Árnadóttir, forstjóri Umhverfisstofnunar, Svandís Svavarsdóttir, umhverfis- og auðlindaráðherra og Gauti Jóhannesson, sveitarstjóri Djúpavogshrepps.

Svandís Svavarsdóttir, umhverfis- og auðlindaráðherra, undirritaði í dag friðlýsingu jarðarinnar Teigarhorns sem fólkvangs. Við sama tækifæri undirritaði ráðherra endurskoðaða friðlýsingu geislasteinanáma á jörðinni sem náttúruvætti.

Íslenska ríkið festi fyrr á árinu kaup á jörðinni sem er um 2000 hektarar að stærð. Þar er einn þekktasti fundarstaður geislasteina (zeolita) í heiminum og var sá hluti jarðarinnar friðlýstur sem náttúruvætti árið 1975. Með endurskoðaðri friðlýsingu náttúruvættisins í dag var svæðið sem það tekur til stækkað.

Frá Teigarhorni. Frá Teigarhorni. Ljósmynd: Andrés Skúlason.

Þá hefur Teigarhorn gegnt mikilvægu hlutverki í sögu og skráningu veðurfars hér á landi. Þar hafa m.a. verið stundaðar veðurfarsathuganir síðan 1881 og mælingar á hitafari frá 1873. Hús Weyvadts kaupmanns á Teigarhorni þykir einnig meðal mikilvægra menningarminja en það var byggt á árunum 1880–1882, en húsið er í umsjá Þjóðminjasafns Íslands. Á Teigarhorni var sömuleiðis starfrækt ljósmyndastofa Nicoline Weywadt sem var fyrst kvenna til að nema ljósmyndun á Íslandi, en hún lauk námi frá Danmörku árið 1872.

Sem fyrr segir hefur jörðin öll nú verið friðlýst sem fólkvangur en markmið friðlýsingarinnar er að tryggja útivistarsvæði í fögru umhverfi þar sem gestum gefst tækifæri á að kynnast sérstakri náttúru svæðisins og sögu jarðarinnar Teigarhorns. Þannig er almenningi heimil för um fólkvanginn en gæta þarf vel að umgengni.

Í dag var einnig undirritaður samningur Umhverfisstofnunar við sveitarfélagið Djúpavogshrepp um daglega umsjón og rekstur friðlýstu svæðanna á Teigarhorni.

Búlandstindur er í landi Teigarhorns. Teigarhorn - Búlandstindur Búlandstindur er í landi Teigarhorns.

Ljósmynd: Andrés Skúlason.