Ný áfangaskýrsla um kynjaáhrif loftslagsmála
Konur nota vistvænni samgöngumáta en karlar og hafa almennt vistvænni lífsstíl en þeir. Þetta er meðal þess sem kemur fram í nýrri áfangaskýrslu um kynjaáhrif loftslagsmála.
Skýrslan er verkefni umhverfis- og auðlindaráðuneytis í kynjaðri fjárlagagerð, þar sem farið er yfir aðgerðaáætlun ríkisstjórnarinnar í loftslagsmálum sem samþykkt var í október 2010. Í áfangaskýrslunni eru kynjaáhrif aðgerðaáætlunarinnar greind og kemur fram í niðurstöðum að þær aðgerðir sem boðaðar eru í áætluninni skapa einkum störf á karllægum sviðum svo sem í landbúnaði og við ýmsa véla– og tæknivinnu. Einnig kom í ljós að svokölluð vistspor (e. ecological footprint) kvenna eru minni en karla sem hlýst af því að lífsstíll kvenna er mun umhverfisvænni en karla.
Er á það bent að aðgerðir íslenskra stjórnvalda í loftslagsmálum miða að því að draga úr losun gróðurhúsalofttegunda sem á endanum gagnast öllum, bæði konum og körlum. Flest jafnréttismarkmið áætlunarinnar tengjast fyrirliggjandi mun á stöðu kynjanna. Undirrót þess kynjamunar er ójöfn staða kvenna og karla á vinnumarkaði, kynbundinn launamunur og ójöfn byrði ólaunaðra umönnunar- og heimilsstarfa. Segir í skýrslunni að undirstaða þess að bæði kynin geti lagt sitt af mörkum í umhverfis- og loftslagsmálum er að jafna þessa ójöfnu stöðu.
Ef konur og karlar eigi að leggja jafnt af mörkum til að koma í veg fyrir loftslagsbreytingar með því að breyta neytendamynstri sínu yfir í vistvænni lífsstíl, verði því sérstaklega að beina sjónum að körlum og því neyslumynstri og lífsstíl sem þeir fylgja.