Ábendingar til nefndar um endurskoðun laga um landgræðslu

Umhverfisráðherra, Svandís Svavarsdóttir, skipaði þann 18. apríl sl. nefnd til að undirbúa gagngera endurskoðun laga um landgræðslu (sjá frétt umhverfsráðuneytisins).  Í erindisbréfi nefndarinnar er verkefni hennar skilgreint eftirfarandi:

„Hlutverk nefndarinnar er að fara yfir núgildandi lög er varða málefni landgræðslu og framkvæmd þeirra, alþjóðlegar skuldbindingar á því sviði, og vinna greinargerð (hvítbók) um hvert skuli vera inntak og áherslur nýrrar löggjafar um landgræðslu og skila til ráðherra eigi síðar en 15. desember 2011.  Á grundvelli hennar mun ráðuneytið í samráði við nefndina vinna drög að frumvarpi til nýrra landgræðslulaga eigi síðar en fyrir árslok 2012“.

Í erindisbréfi nefndarinnar leggur ráðuneytið áherslu á að við endurskoðunina verði m.a. skýrð betur eftirfarandi ákvæði:

• Verndun gróðurvistkerfa og jarðvegs.
• Leiðir til landgræðslu með það meginmarkmið að byggja upp og endurheimta gróður- og jarðvegsauðlindir landsins.
• Hvernig stuðlað verði að því að nýting gróður- og jarðvegsauðlinda verði sjálfbær.
• Athugun á sambærilegri löggjöf annarra ríkja eftir því sem við á.

Í erindisbréfi nefndarinnar er jafnframt lögð rík áhersla að haft verði samráð við hagsmunaaðila.

Nefndin hefur hafið störf og vill í upphafi vinnu sinnar leita eftir viðhorfum sem flestra til endurskoðunar laga um landgræðslu.  Hefur hópi hagsmunaðila verið sent bréf þess efnis. Hér á vefsíðunni er fólki jafnframt boðið að koma á framfæri athugasemdum og ábendingum til nefndarinnar um endurskoðun laga um landgræðslu.      

Óskað er eftir að ábendingar berist til: Umhverfsráðuneytið, Skuggasundi 1, 150 Reykjavík eða á netfangið [email protected] fyrir 1. júlí n.k.