Lög um meðhöndlun úrgangs

Á nýliðnu þingi voru samþykkt lög um meðhöndlun úrgangs. Markmið laganna er að stuðla að því

- að meðhöndlun úrgangs valdi sem minnstum óæskilegum áhrifum á umhverfið og mengi ekki vatn, jarðveg né andrúmsloft
- að draga úr hættu sem förgun úrgangs getur haft á heilsu manna og dýra
- að dregið verði skipulega úr myndun úrgangsefna eftir því sem unnt er
- að þeim úrgangi sem myndast verði komið í endurnotkun og endurnýtingu
- og að nauðsynlegri förgun úrgangs háttað þannig að hann nái jafnvægi við umhverfi sitt á sem skemmstum tíma.

Helstu nýmæli laganna eru að gert er ráð fyrir að skilyrði í starfsleyfum fyrir urðunarstaði verði strangari en áður. Kveðið er á um að urðunarstaðir skuli vaktaðir að jafnaði í 30 ár frá lokun þeirra. Jafnframt er kveðið á um að rekstraraðili leggi fram fjárhagslega tryggingu fyrir því að uppfylltar verði þær skyldur sem í starfsleyfinu felast þar á meðal um lokunar- og eftirlitsaðgerðir í kjölfar lokunar urðunarstaðarins.

Starfandi urðunarstaðir skulu laga sig að breyttum kröfum fyrir 16. júlí 2009. Einnig hefur nú verið fest í lög að gera skuli lands- og svæðisáætlanir um meðhöndlun úrgangs sem hafa skulu það að markmiði að draga markvisst úr úrgangi, auka endurnotkun og endurnýtingu.

Þá er sveitarfélögum gert skylt, í samræmi við svokallaða mengunarbótareglu, að innheimta gjöld fyrir meðhöndlun úrgangs sem nægja a.m.k. fyrir förgun hans en heimilt er að innheimta gjöld fyrir alla meðhöndlun úrgangs. Nánar...

Umhverfisráðuneytið