Skipulagsmál

Við mörg borð voru skipulagsmál talin ein helsta undirstaða þess að ná raunverulegum árangri við uppbygginu sjálfbærs samfélags. Efla þurfi áherslu á sjálfbærni í skipulagsmálum. Þörf sé á markvissu skipulagi byggðar sem hafi sjálfbærni að leiðarljósi. Byggða- og samgöngumynstur þurfi að taka mið af sjálfbærniáherslum svo sem blöndun landnotkunar, þéttingu byggðar, þjónustu í nærumhverfinu, verndun náttúru, sögu og menningarverðmæta. Vinna þurfi skipulag og áætlanir með langtímahugsun að leiðarljósi fyrir alla landnýtingu og auðlindir. Landsskipulag var nefnt sem góð leið í þessu samhengi þar sem mótuð sé heildræn stefna um landnotkun með tilliti til lífs- og umhverfisgæða.

Dæmi um tillögur og ábendingar:

• Efla skipulag og skýra hlutverk í skipulagsmálum.
• Heildarsýn í samgöngumálum.
• Tryggja heildstæða þjónustu í nærumhverfi - Það eru skipulagsmál!
• Þétta byggð og blanda landnotkun. Lagarammi í skipulagsmálum á að leiða til sjálfbærni en ekki sóunar eins og verið hefur.
• Meta sögu- og menningarverðmæti og skilgreina náttúruvernd sem veigamikinn þátt í sjálfbærri þróun.