Tillögu um vegalagningu yfir Grunnafjörð synjað

21.8.2007

Umhverfisráðherra hefur synjað staðfestingu á þeim hluta aðalskipulags Leirár- og Melahrepps er varðar vegalagningu yfir Grunnafjörð en staðfestir það að öðru leyti. Staðfestingu á þeim hluta aðalskipulags Skilmannahrepps er varðar vegalagningu yfir Grunnafjörð var einnig synjað.

Skipulagsstofnun og Umhverfisstofnun höfðu áður lagst gegn því að þessi hluti framangreindra aðalskipulaga yrði staðfestur þar sem Grunnafjörður er friðlýst svæði og allt jarðrask á friðlandinu óheimilt. Grunnafjörður er talinn eitt mikilvægasta votlendissvæði Íslands og eitt af þremur svæðum á landinu sem tilkynnt hefur verið til alþjóðlegrar skrár um verndun votlendis sem komið var á fót á grundvelli Ramsar-samþykktarinnar um votlendi sem hafa alþjóðlegt gildi, einkum fyrir fuglalíf.

Í ljósi þessa telur umhverfisráðherra ekki unnt að staðfesta þann hluta skipulagstillagnanna er varðar fyrirhugaða veglínu yfir Grunnafjörð. Samkvæmt skipulags- og byggingarlögum er aðalskipulag, eða breyting á því, háð staðfestingu umhverfisráðherra.

Grunnafjörður var gerður að friðlandi árið 1994 og samþykktur sem Ramsarsvæði 1996. Víðlendar leirur eru í firðinum og má segja að hann sé frekar leirulón en eiginlegur fjörður. Margir vaðfuglar, svo sem sendlingur, lóuþræll, sandlóa og tjaldur, byggja tilveru sína á lífríki leiranna. Þá halda margir æðarfulgar til í firðinum og um fjórðungur margæsastofnsins hefur viðkomu þar á ferðum sínum frá meginlandi Evrópu til heimskautasvæðanna. Margar fuglategundir treysta á Grunnafjörð á veturna og má þar meðal annars nefna tjaldinn.

Senda grein