Árni Bragason forstjóri Náttúruverndar ríkisins

Guðmundur Bjarnason umhverfisráðherra hefur skipað Árna Bragason forstjóra Náttúruverndar ríkisins, að fenginni umsögn stjórnar stofnunarinnar. Árni er skipaður forstjóri frá og með 1. febrúar, en hann tekur við af Aðalheiði Jóhannsdóttur, sem óskað hafði eftir lausn frá störfum. Átta umsækjendur voru um stöðuna.

Árni Bragason er forstöðumaður Rannsóknastöðvar Skógræktar ríkisins að Mógilsá, en hann hefur gegnt því starfi frá árinu 1990. Hann lauk B.S.-prófi í líffræði frá Háskóla Íslands 1976 og doktorsprófi í jurtakynbótum frá Landbúnaðarháskólanum í Kaupmannahöfn 1986.