Fréttasafn
Umhverfisráð ungmenna verður ráðherra til ráðgjafar
Á Umhverfisþingi 2009
Svandís Svavarsdóttir umhverfisráðherra þakkar þeim Unnsteini Manuel Stefánssyni og Sigríði Ólafsdóttur fyrir ávarp sem þau fluttu á Umhverfisþingi fyrir hönd ungs fólks.
Umhverfisþingi lauk í dag. Í lokaávarpi þingsins sagði Svandís Svavarsdóttir umhverfisráðherra að hún hefði ákveðið að stofna umhverfisráð ungmenna sem ætti að vera umhverfisráðherra til ráðgjafar. Fulltrúar ungs fólks á Umhverfisþingi lögðu fram tillögu þess efnis.
Á síðari degi Umhverfisþings voru flutt stutt erindi þar sem reynt var að svara spurningunni hvernig náum við takmarkinu um sjálfbært Ísland. Auk þess tóku þinggestir þátt í umræðum á samráðsfundi í heimskaffistíl þar sem fjallað var um sömu spurningu.
Á heimasíðu umhverfisráðuneytisins verður fljótlega hægt að nálgast upptökur erinda sem flutt voru á Umhverfisþingi 2009.
