Efst á baugi
Umhverfisráðherra skoðar endurvinnslu á plasti
Hjá PM endurvinnslu í Gufunesi
Stefán Halldórsson, einn af eigendum PM endurvinnslu, sýnir Þórunni Sveinbjarnardóttur umhverfisráðherra framleiðslu fyrirtækisins.
Þórunn Sveinbjarnardóttir umhverfisráðherra heimsótti PM endurvinnslu ehf. í Gufunesi í fyrradag. Fyrirtækið sérhæfir sig í endurvinnslu á bændafilmu, trollum og þorskanetum.
Vinnsla fyrirtækisins er byggð á þróunarvinnu Jóns Einar Hjartarsonar að Læk í Ölfusi sem hefur frá árinu 1980 unnið að endurvinnslu á plasti og framleiðslu á plasthlutum úr hinu endurunna efni. Jón hefur hlotið viðurkenningar fyrir frumkvöðlastarf á sviði endurvinnslu.
Með þeirri tækni sem fyrirtækið hefur þróað er hægt að þvo hráefnið það vel að gæði þess endurunna plasts sem vélarnar skila af sér eru með þeim bestu sem völ er á.
Endurvinnslulína sem sett hefur verið upp í Gufunesinu getur unnið 4.000 tonn af plasti á ári.
