Í umhverfis- og auðlindaráðuneytinu var þann 21. maí sl. úrskurðað í máli UMH12120081 vegna stjórnsýslukæru Ólafs Valssonar og Sifjar Konráðsdóttur þar sem kærð var ákvörðun Skipulagsstofnunar um að kerfisáætlun Landsnets hf. félli ekki undir 3. gr. laga nr. 105/2006 um umhverfismat áætlana. 

Loftslagsbreytingar eru helsta ógn við lífríki Norðurslóða, að fram kemur í nýrri úttekt á líffræðilegri fjölbreytni á svæðinu, sem kynnt var á nýafstöðnum ráðherrafundi Norðurskautsráðsins í Kiruna í Svíþjóð. Hlýnun er um tvöfalt hraðari á Norðurheimskautssvæðinu en að meðaltali á jörðinni og hefur hafís hopað mun hraðar en búist var við.

Samráðsnefnd um málefni er varða verndun hella skilaði Svandísi Svavarsdóttur, umhverfis- og auðlindaráðherra skýrslu sinni í síðasta mánuði. Í kjölfarið var skv. tillögu nefndarinnar sérstök ráðgjafanefnd um verndun hella skipuð.

Skýrslan Vernd, velferð og veiðar villtra fugla og spendýra sem inniheldur umfjöllun og tillögur nefndar um stöðu villtra fugla og villtra spendýra hefur nú verið gerð aðgengileg á vef umhverfis- og auðlindaráðuneytisins.

Góður rómur var gerður að málþingi um loftgæði og lýðheilsu sem umhverfis- og auðlindaráðuneytið og velferðarráðuneytið stóðu fyrir á Nauthóli í Öskjuhlíð í síðustu viku. Á þinginu var fylgt úr hlaði nýju riti stýrihóps á vegum ráðuneytanna þar sem fjallað er um sama efni og tillögur um úrbætur lagðar fram.